by തിരുവണ്ണാമലൈ പട്ടണത്തിലെ പ്രസിദ്ധമായ അരുണാചലേശ്വർ ക്ഷേത്രത്തിൽ ദർശനം നടത്തി നടൻ മോഹൻലാൽ. എഴുത്തുകാരനും തിരക്കഥാകൃത്തുമായ ആർ രാമാനന്ദിനൊടൊപ്പമാണ് മോഹൻലാൽ ക്ഷേത്ര ദർശനം നടത്തിയത്. ശ്രീനാരായണഗുരുവിന്റെ വളരെ പ്രശസ്തമായ സദാശിവദർശനത്തിലെ ശ്ലോകതോടൊപ്പമാണ് രാമാനന്ദ് ചിത്രങ്ങൾ പങ്കുവച്ചിട്ടുള്ളത്. വളരെ പെട്ടന്ന് തന്നെ അത് വൈറലായി മാറി.
മോഹൻലാലും രാമാനന്ദും ഈ അടുത്തിടെയാണ് ആന്ധ്രാപ്രദേശിലെ കർണൂലിൽ സ്വാമി അവധൂത നാദാനന്ദയുടെ ആശ്രമത്തിൽ പോയത്. അന്നും രാമാനന്ദ് ചിത്രങ്ങൾ പങ്കുവച്ചിട്ടുണ്ടായിരുന്നു. മോഹൻലാൽ ആത്മീയ പാതയിലേക്ക് പോവുകയാണോ എന്നും അന്ന് പലരും ചോദിച്ചിരുന്നു. അന്ന് എമ്പുരാന്റെ ചിത്രീകരണത്തിന് ഇടയിലാണ് പോയതെങ്കിൽ ഇന്ന് രണ്ടാമത്തെ ഷെഡ്യൂൾ പൂർത്തിയായിട്ടാണ്.
“അടിക്കു പന്നി പോയി നിന്മുടിക്കൊരന്നവും പറന്നടുത്തു കണ്ടതില്ല നിന്നെയിന്നുമഗ്നിശൈലമേ, എടത്തു നീ വിഴുങ്ങിയെന്നെയിന്ദ്രിയങ്ങളോടുടന്‍ നടിച്ചിടും നമശ്ശിവായ നായകാ, നമോ നമ..” സദാശിവദർശനം -ശ്രീ നാരായണഗുരു, ലാലേട്ടനുമൊത്ത് തിരുവണ്ണാമല..”, സദാശിവദർശന ശ്ലോകത്തിലെ ഭാഗം കുറിച്ചുകൊണ്ടാണ് രാമാനന്ദ് ചിത്രങ്ങൾ പോസ്റ്റ് ചെയ്തത്. സദാശിവദർശനം കീർത്തനത്തിലെ അവസാനത്തെ വരികളാണ് ഇത്.
ക്ഷേത്രത്തിലെ മലമുകളിൽ നിന്നുള്ളതും ക്ഷേത്രത്തിലെ പോകുന്ന പാതയിൽ നിന്നുള്ളതുമായ ചിത്രങ്ങളുമാണ് ഇവ. മലയുടെ മുകളിൽ നിൽക്കുന്ന ചിത്രത്തിന് പിന്നിലായി അരുണാചലേശ്വര ക്ഷേത്രത്തിന്റെ ഗോപുരങ്ങൾ ദൂരകാഴ്ചയായി കാണാനും സാധിക്കും. മല കയറി വളരെ ക്ഷീണിതനായിട്ടാണ് ചിത്രങ്ങളിൽ മോഹൻലാലിനെ കാണാൻ സാധിക്കുന്നത്. നെറ്റിൽ ഭസ്മകുറി തൊട്ട് ദൈവീകമായ ലുക്കിലാണ് മോഹൻലാൽ മല കയറിയത്.
