by തൃശ്ശൂരിൽ വിജയിച്ച സുരേഷ് ഗോപിയെ അഭിനന്ദിച്ച് പോസ്റ്റിടുന്ന സിനിമ പ്രവർത്തകരെ വിമർശിച്ച് സംവിധായകനും കഴിഞ്ഞ ബിഗ് ബോസ് വിജയിയുമായ അഖിൽ മാരാർ. മത്സരിക്കാൻ നിന്നപ്പോൾ ഒരാൾ പോലും അദ്ദേഹം ജയിക്കണമെന്ന് പറഞ്ഞ് പോസ്റ്റ് ഇട്ടിട്ടില്ലെന്നും അദ്ദേഹത്തിന് എതിരെ ഒരുപാട് വിമർശനങ്ങൾ വന്നപ്പോൾ ഒപ്പം നിന്നില്ലെന്നും എന്തിന് സമാജം സ്റ്റാർ എന്ന് ആക്ഷേപം കേൾക്കുന്ന ഉണ്ണി മുകുന്ദൻ പോലും പോസ്റ്റിട്ടില്ലെന്നും ചൂണ്ടിക്കാണിച്ചാണ് അഖിൽ മാരാർ വിമർശിച്ചത്.
“വിജയത്തിന് നിരവധി അവകാശികൾ ഉണ്ടാകും. സുരേഷ് ഗോപിയെ അഭിനന്ദിച്ചു കൊണ്ട് മലയാള സിനിമ മേഖലയിലെ സകലരും ആശംസ പോസ്റ്റുകൾ ഇടാൻ മത്സരിക്കുകയാണ്. രാഷ്ട്രീയത്തിന്റെ പേരിൽ സുരേഷ് ഗോപി ഹീനമായി ആക്ര,മിക്കപെട്ടപ്പോൾ അദ്ദേഹത്തെ തോൽപ്പിക്കാൻ നികൃഷ്ട ആരോപണങ്ങൾ അദ്ദേഹത്തിന്റെ മുകളിൽ ഉന്നയിച്ചപ്പോൾ, സ്ത്രീ വിരുദ്ധനായി കള്ളക്കേസ് കൊടുത്തപ്പോൾ ഒരക്ഷരം മിണ്ടാതെ മാറി നിന്നവരാണ്.
കമ്മ്യൂണിസ്റ്റ് കാരനായ കൊല്ലം ലോകസഭ സ്ഥാനാർഥിയായ മുകേഷ് എംഎൽഎ പോലും സുരേഷ് ഗോപി എന്ന വ്യക്തിയുടെ നന്മയെ കുറിച്ച് തുറന്ന് പറഞ്ഞപ്പോൾ ഗണേഷ് കുമാർ ഹീനമായ ഭാഷയിൽ അദ്ദേഹത്തെ ആക്ഷേപിച്ചു. സമാജം സ്റ്റാർ എന്ന് ആക്ഷേപം കേൾക്കേണ്ടി വരുന്ന ഉണ്ണി മുകുന്ദൻ പോലും ഒരിക്കൽ പോലും സുരേഷ് ഗോപി ജയിക്കണം എന്ന് പോസ്റ്റ് ഇടുകയോ, അദ്ദേഹത്തിനെതിരെ വന്ന ആരോപണങ്ങൾക്ക് എതിരെ അഭിപ്രായം പറയുകയോ, അദ്ദേഹത്തിന്റെ പ്രചാരണ വേദിയിൽ പോകുകയോ ചെയ്തിട്ടില്ല.
സുരേഷിന്റെ രാഷ്ട്രീയം എന്ത് ആയാലും സുരേഷ് ഒരു നല്ല മനുഷ്യനാണ് അദ്ദേഹം ജയിച്ചാൽ നാടിന് ഗുണം ഉണ്ടാകും എന്ന് അറിയുന്ന സഹപ്രവർത്തകർ പോലും വിമർശനങ്ങളെ ഭയന്ന് അല്ലെങ്കിൽ സ്വന്തം നേട്ടങ്ങൾക്ക് കോട്ടം വരും എന്ന് ഭയന്ന് മിണ്ടാതെ മാറി നിന്നവരാണ്. ഇവരാരും സുരേഷ് ഗോപി ജയിക്കും എന്ന് സ്വപ്നത്തിൽ ചിന്തിച്ചിരുന്നില്ല. ജനങ്ങൾ അദ്ദേഹത്തിന്റെ മനസിന്റെ നന്മ തിരിച്ചറിഞ്ഞു. ക്ഷമയും കഠിനധ്വാനവും ഈശ്വരാനുഗ്രഹവും പരിശ്രമവും അതിലുപരി അദ്ദേഹത്തിന് വേണ്ടി ഊണും ഉറക്കവും കളഞ്ഞു പണിയെടുത്ത പാർട്ടിയുടെ പ്രവർത്തകരും ആണ് സുരേഷ് ഗോപിയെന്ന മനുഷ്യന്റെ വിജയത്തിന് കാരണം.
നാളെയിൽ അദ്ദേഹം കേന്ദ്രമന്ത്രി ആകും. പലവിധ കാര്യങ്ങൾ പറഞ്ഞു പഴയ സഹപ്രവർത്തകർ അങ്ങയുടെ ഒപ്പം കൂടും അടുപ്പിക്കരുത് എന്ന് പറയുന്നില്ല തിരിച്ചറിയണം എന്ന് മാത്രം. എന്നാൽ അങ്ങേയ്ക്ക് വേണ്ടി കഷ്ടപ്പെട്ട ഓരോ പാർട്ടി പ്രവർത്തകരെയും ഒപ്പം ചേർത്ത് പിടിച്ചു. തൃശൂർ ജനതയെ നെഞ്ചിലേറ്റി കപട സൗഹൃദങ്ങളെ തിരിച്ചറിഞ്ഞു അതിലുപരി രാഷ്ട്രീയത്തിന്റെ പേരിൽ മതത്തിന്റെ പേരിൽ ഒരാൾക്ക് പോലും വേദന സമ്മാനിക്കാതെ എല്ലാവരെയും ചേർത്ത് പിടിച്ചു മുന്നോട്ട് പോകാൻ അങ്ങേയ്ക്ക് കഴിയട്ടെ. ബിഗ് ബോസിന് ശേഷം ഞാൻ പങ്കെടുത്ത രാഷ്ട്രീയ പരിപാടികൾ എല്ലാം കോൺഗ്രസിന്റെ വേദികൾ ആയിരുന്നു.
സുരേഷ് ഗോപിക്ക് വേണ്ടി സംസാരിച്ചു എന്ന കാരണത്താൽ എന്നെ സംഘിയാക്കി വർഗീയ വാദിയാക്കി ആക്ഷേപിക്കാൻ മുന്നിൽ നിന്നതും നിരവധി കോൺഗ്രസുകാർ ആയിരുന്നു.. അത് കൊണ്ട് അദ്ദേഹത്തിന് വിജയം സമ്മാനിച്ച തൃശൂരിലെ ജനങ്ങൾ എന്നെ കൂടി ജയിപ്പിച്ചിരിക്കുന്നു എന്നതാണ് എന്റെ വ്യക്തിപരമായ സന്തോഷം.. ഒരിക്കൽ കൂടി ഹൃദയം നിറഞ്ഞ ആശംസകൾ സുരേഷേട്ടാ..”, അഖിൽ മാരാർ സിനിമ പ്രവർത്തകരെ മുഴുവനും വിമർശിച്ചുകൊണ്ട് കുറിച്ചു. താങ്കൾ എന്താണ് സുരേഷ് ഗോപിയുടെ വിജയത്തിന് വേണ്ടി ചെയ്തതെന്നും ചിലർ ചോദിക്കുന്നുണ്ട്.